AAWO, AB, D.67, f. 61v

Reverendissimo in Christo Patri et Domino, domino Ioanni Dantisco Dei gratia episcopo Culmensi, coadiutori Warmiensi et ecclesiae Pomezaniensis administratori, domino suo observandissimo

AAWO, AB, D.67, f. 61r

Reverendissime in Christo Pater et Domine, domine observandissime.

Servitiorum meorum commendatione praemissa.

Reverendissime Domine.

Congratulor de prospero reditu et quod obtrectationum pericula superaverit. Bene cesserint fata, eo quod Reverendissima Dominatio Vestra fuerat praesens. Ea praesentia, meo iudicio, non parum profuit, pars vero adversa, quam non habita causa inculpare studuerunt, sibiipsis (iudicio Dei) inusserunt infamiam. Utinam resipiscerent et de cetero cautiores essent, nec aliis in complacentiam delirarent etc. Sed haec alias.

Cum causa Mathiae Renglyn alias Pyschinski tam frigide per nuntios terrestres praetermissa et neglecta est de incursione, quam quidam Sigismundus Grudzenski cum complicibus suis in terram Pomeraniae fecerat vi armata, quare idem Mathias Pischinski precatur, ne adhuc desereretur in sua actione, sed ut ea causa per maiestatem regiam committeretur dominis commissariis, qui pro Divi Stanislai festo in has terras missuri sunt. Quare Reverendissima Dominatio Vestra dignetur inter alia omnium nostrum nomine scribere serenissimae maiestati regiae, quo praedictae causae examinatio et iudicium eisdem dominis commissariis committere dignabitur.

Reliquum meum sentire hesterno die Reverendissimae Dominationi Vestrae scripsi. Cum his me Reverendissimae Dominationi Vestrae humiliter commendo. Quam felicissime in multos annos valere cupio.

Quantum ex litteris nuper ad me datis reverendissimi episcopi Warmiensis intelligo, suam reverendissimam dominationem ad futurum conventum, quamvis libentissime cuperet, venire non posse. Necesse habet cavere motum, qui eum debilitat etc.

Ex Meva, feria quinta post Oculi anno salutis nostrae 1537.

Eiusdem Reverendissimae Dominationi Vestrae observandissimus Georgius a Basen etc. palatinus Marienburgensis et Mevensis capitaneus scripsit