Venerabilis Domine, frater carissime.

Salutem et felicitatem.

Nobilem dominum Cr[is]tophorum Conarsky nuntium regium ad eum modum, ut voluit Reverendissim[us] dominus Plocensis a me dimisi, dedique illi equum canhterium, quem a Dominatione Vestra habui, litterasque ad magistratum et amicos Gedanu[m] eunti, ut stamen panni Lundensis et marcas 50 nostras ad reverendissimi domini Plocensis et meam commendationem assequi possit etc.

De animi Dominationis Vestrae integritate non est, quod dubitem, quicquid etiam syndicus attulerit, qui de se magistratui et citatis plurima prolixe pollicitus est. Ego, quod in me fuit quodque religioni et serenissimae maiestati regiae debui, praestiti. Ad id me certe nulla affectio, sed nuda induxit fides, quam ad hunc modum habens, exonerata non est, quod me angit, ut quodcumque etiam fieri aula voluerit, exspecto, tamen cum nuntio meo, quid ea in re sit actum et quomodo dominorum consiliariorum responsum hinc ex conventu novissimo placuerit, de his ut me Dominatio Vestra non gravate certiorem reddat, oro. Dicta testium Dominatio Vestra a nuntio meo, qui 9 huius hinc exivit, iam, ut reor, accepit.

Possessio domino Nicolao Locca superiori die apud ecclesiam data est, quam adversarii in capitulo praeposteris ac odiosis rationibus nixi suspenderant, eam suspensionem misso ad capitulum domino administratore Allensteinensi solvi, dataque est iam integra possessio. Commenti sunt fotores proscri[p]ti (quod hic apud ecclesiam iactatur) contra nepotem meum in Urbe nescio quod crimen falsi. De eo si quid Dominatio Vestra ac[ce]perit, significet, exemplumque regiarum litterarum ad quattuor illos cardinales ad me, quaeso, mittat. Si quid postea se obtulerit, quamprimum nuntius meus ex aula redierit iterum dictabo. Quodque illi toties tot scriptionibus molestus sim, patienter, quaes[o], ferat.

Forte se aliquando occasio accommodabit, qua Dominatio Vestra b[ene]volentiam et gratitudinem meam erga se pro tot susceptis laboribus non aulice, sed re ipsa agnoscet.

Quam felicissime valere cupio.

Datae ut supra.