APG 300, 53, 268, p. 214

Den ersamen und namhafftigen herrenn burgermeister und rathmannen der ko(nigliche)n stadt Danczig, / unsern besondernn, guthenn freundenn.

APG 300, 53, 268, p. 209

Unnserenn freuntlichenn grues unnd alles guetts zuvoran. Ersame, namhafftige herrn, besonndere, guette freunde.

Uff Ewer E(rbarkei)t schreybenn, / das unns vorgesternn gewordenn, / hab wyr zeyttlich gesterigs thags denn bothenn mit unnsernn vorschriefftenn, / wie die copeienn eingelegt mitbringenn, / an ko(nigliche)n hoff vonn unns gefertiget / unnd denn hochwirdigenn herrn von Plotzko unnderkanntzler inn eim sonndernn zeddell gebethenn, / so unns ko(niglich)e m(aieste)t zw antwurtenn thet befelhenn, / das solcher brief magistro Jacobo, oder inn abwesenn E(wer) E(rbarkei)t bothenn wurd mitgegebenn. Wann der ann E(wer) E(rbarkei)t gelannget, losse wyrs E(wer) E(rbarkei)t frey ihn auszuthunn / unnd daraus ko(nigliche)n wyllenn zuvormerckenn etc. Wyr habenn auch gesterigs thags von f(urstlicher) d(urchlauch)t der beschickung halbenn an ko(niglich)e m(aieste)t in den denischenn henndlen bescheidt uberkomenn / und denselbtenn, / wie wyrs nechst mit E(wer) E(rbarkei)t geschicktenn vorlossenn, / an den hochwirdigenn hern bischoff zw Culmennsehe / durch eignenn bothenn zugeschrybbenn, / wie sein lieb villeicht mit dem ersamenn h(ern) Cristoff Beyer E(wer) E(rbarkei)t wirt berichtenn. / Solchs alles hab wir E(wer) E(rbarkei)t, die wyr gotlichenn gnaden befelhenn, uf derselbten schreibenn freuntlicher mheinung nicht wollen vorhaltenn.

Dat(um) aus unserem schlos Heilsbergk, den II Decembris M D XLIII.

Joannes, vonn Gotts gnadenn bischoff tzw Ermelanndt