Dem durchlauchtigen, hochgebornen fursten und herren, hern Albrechten, von Gots gnaden marggraffen zu Brandenburg, / in Preussen, zu Stetin, Pommern, der Cassuben und Wenden hertzogk, burggraff zu Normberg und furst zu Rugenn, unserm hochgunstigen, lieben hern und freunde

Durchlauchter, hochgeborner furst, hochgunstiger, lieber her und freundt. / Unsere freuntliche und vleiswillige dinste zuvoran. /

Ewer Furstlichen Durchlaucht uff unser negst schreiben antwort / und den zedell dorin vorschlossen / hab wir gerne gelesen, / und ist uns fast wolgefallenn, / das Ewer Furstliche Durchlaucht ire geschickte uff die tagefart in der Cron abzufertigen hat vorgenommen, / die welche so stille nicht wirt mugen gehalten. / Es werden derhalben Ewer Furstlichen Durchlaucht bericht uberkommen. / Bei uns ists ungewis, / das ane beiwesen koniglicher maiestet, unsers aller gnedigisten herren, / solche tagleistung solt gehaltenn werden, / derwegen so wir was bestendiges erfaren, / wie wir negst geschrieben, / wolle wir durch eigen boten Ewer Furstlichen Durchlaucht nicht vorhalten, / und bedancken uns mit sonderm vleis des erbietens, / das uns Ewer Furstliche Durchlaucht zuwissen gethan, / ab wir iren geschickten an solchen tag / etwas unser sachen mitzugeben gesint weren, / do wir nicht sonders dismal haben auszurichten. /

Was wir aber zu forderung Ewer Furstlichen Durchlaucht grentz handell / durch unser schreiben / bei unsern guten hern unnd freunden fortzustellen wusten, / dorzu sein wir unbeschwert / und willig, / dan Ewer Furstliche Durchlaucht freuntlich zudienen, / vil ehre und nutz zuschaffen, / und der uns allenthalben zuvorhalten, / wie auch der achtbar, wolgelert her magister Johan Lomuller, Ewer Furstlichen Durchlaucht rath und getreuer, wirt anzeigenn, / wolle wir bereitt und begirig werden gefunden. /

Datum Heilsberg, den VII Marcii M D XLII. /

Ioannes, von Gots gnaden bischoff zu Ermelandt /

Ioannes episcopus Varmensis etc. manu propria subscripsit